2013.09.08 Sun
星期日，我o地又去 Hyde park 做 event 喇，今次係 BBC Radio 2 o既 Live！11 am ，各 production 單位，各種小食檔單位都o係度準備緊！當時天氣仲好好哋！但過o左 2 個鐘，就久唔久落陣雨喇，好乞人憎o既雨天！
開始去 event 去到無感覺o既時候，都唔知道原來今晚有 Jessie J，好正呀佢唱 live ，氣氛超好！！so so so happy!!!
當時要做o野，走唔開，今日去返 BBC official website 睇相，睇番都覺得好好 feel !!
外國o既 show / event 真係好揼本，成日係尾場都會有煙花，上次板球賽完場，又係有煙花 (球賽都有煙花，真係隆重其事！)，3 個月入面，已經有 4 次煙花睇，年紀越大越愛睇煙花o既自己，睇得好開心！！
2013.09.09 Mon
今日一早已經落住綿綿細雨，陪男友出去買o野，我又去「榮業」睇下有咩貨可以入！
返到嚟，即刻煮 lunch 食，晏晝，唔好食太多，煎下 d 簡單o野算喇！！
買o左呢隻白菜豬肉餃試下！
同埋試試水溫，蒸隻珍珠雞俾男友試下，睇下佢受唔受得住荷葉味！
整o左盤毛豆，以前o係香港時，去親食日本o野，一定 order 「日本枝豆」，細細碟，十零條一客，點知有次行過菜檔，見到有賣「毛豆」 HKD $10/斤，激死人，原來「枝豆 = 毛豆」，HKD $10 可以食到你傻！
今日見到 £1.5 (唔記得實際價錢)一包毛豆！即刻買o黎整！！
以前o係日式餐廳食開，都係烚好之後，撒鹽。但英國呢邊o既日本餐廳，係落七味粉 + 鹽 + 麻油 (落海鹽的話，味道更好)！而男友亦食開呢隻味，今日佢發現女友我可以整到餐廳隻味，我o地以後出街，又可以慳番筆，再食 d 自己唔煮o既o野！！
以前煎餃子，都係齋煎就算，但近日 yahoo blog 「關閉事件」，令我不期然四圍回顧其他 blogger o既 blog, 跟佢o地o既方法煎餃！果然，落水煎，真係好食好多，有嫩滑面 + 脆皮底！
方法：
1. 落 2 匙油，大火燒熱後，放入未解凍o既餃子
2. 煎約 2 分鐘後，落半碗熱水，搇蓋，中火煮 8 分鐘
3. 開蓋，繼續煎 3 分鐘，令水分蒸發
4. 落數滴麻油上面，完成
餃子醬：
生抽 2 湯匙
豆板醬 1 茶匙
海鮮醬 1 茶匙
以上拌勻即可，點食餃子，好惹味
而呢隻牌子o既珍珠雞，都幾足料！而水溫亦測試成功，男友食完，問我仲有無存貨！
男友食食下 lunch，一直自己係度講：「 I am so lucky」，我只係笑笑o地，無答佢，雖然餐 lunch 都只係加熱o既半製成品，但每次我煮親飯，佢都會食食下，自己講：「I am so lucky」，比起「煮得好好味」呢一類贊美說話，我覺得更加心甜。
但，世事永遠無完美！！！！！
我去洗碗，佢就走去洗車，期間叫我去幫幫手，我一「幫」，就幫佢整崩o左開逢蓋隻角！！！
愛車如命o既男友，重覆 3 次：「都唔重！！！」「搬 5 秒o野咋嘛」
「咁真係太重吖嘛！！我真係唔夠力！！」
繼上次臨賣車前，我倒瀉杯熱朱古力，今次呢架又嵌崩隻角，佢都係自己繼續努力吧！！ 😛
點擊便能為這篇文章進行評等！
[評等總次數: 0，平均評等: 0]