我從意大利媽媽身上學到的事 - 清潔屋企每一條罅的塵

過o左英國都快有 3 個月,自我過o左o黎之後,好多時都會直接留o係男友爸爸媽媽屋企作客,有宗教信仰o既佢o地,仍然存在住:未結婚o既,係唔可以同房瞓o既觀念,無論早、午、晚,即使單獨o係房,亦要打開隻門,以示清白。

當然,我都會「識做」,去得人o地父母屋企,除o左去個廳同大伙兒大方地一齊坐住睇電視,就係幫男友媽咪手煮飯,同做家務。

煮西餐我唔講太多住,但由我第一次開口話要幫佢媽媽手做家務開始,佢o既要求好少,只係要我將每一隻窗同窗邊的罅都抹乾淨而無塵而已,好吧!我用濕布抹窗,抹完 3 層樓之後,之前慢慢風乾o既清水漬,乾o左之後變成一撻撻水印,原來,玻璃窗要用玻璃專用噴劑去清潔 (屋企都要咁專業?!),窗邊罅要用另一條毛巾抹塵。幫倒忙o既我,最後都係 auntie 執手尾!

而家,我已經習慣抹所有o既窗或玻璃,甚至唔同材質o既家具,都用各種唔同o既清潔噴劑!!之後,仲要噴及抹上令家具閃亮o既噴劑!!以往我o係香港,都無試過咁做,清潔o左,就算啦,仲打蠟!?

auntie 除o左每朝早 7 點起身準備男友爸爸o既早餐,洗、曬、熨衫,買餸煮飯,淋花,吸塵抹地,清潔 3 層高o既房子之外,仲會每日溫習,讀聖經。呢 d 係佢每一日做o既事,而每隔一個星期,就會全屋進行抹塵,將 3 層樓高房子o既每一處除塵!每個月,就係花園進行大清潔。

天啊!!難怪我一直都見唔到間屋有塵!!!

直到前晚,我又問佢:auntie,你有無任何事想我幫你手?佢叫我去熨衫,我行埋衣服堆之中,叫我驚訝o既,係除o左熨衫,當中仲有床單,被袋同枕頭套。我忍唔住問 auntie:你連呢 d 都燙?????? auntie 微笑答我:用起上o黎,感覺整齊 d,睇落去舒服 d 。

太過一絲不苟了吧!!!!!!!!!!! 驚嘆!!!

我今日見住 auntie 又進行日常清潔,幫佢手之間,忍唔住同佢講:我 29 歲人,你係第一個人令我真真切切咁認識到家庭主婦呢一回事,如果確確切切的做,令成個家維持得有幾咁妥當!

auntie 笑了笑:多謝你,得到呢個讚賞,我好開心。

62 歲o既 auntie, 年紀都唔細,仲日日咁堅持,默默照顧屋企上下各人,我已經覺得佢呢種太太,真係太少有,我的泰國媽媽,是工作型女性,所以男友媽媽這一種全職家庭主婦,香港都有,但將家務做得貼貼燙燙,照顧 5 個男生 (4 個仔仔 + 老公),而家已經好少有喇。

你有抹掉自己屋企每一條罅的塵嗎?

點擊便能為這篇文章進行評等!
[評等總次數: 0,平均評等: 0]