呢個簡易雲吞湯係我男友食極唔厭，仲每次有朋友o黎，都要我整俾佢朋友試o既其一項中菜。
話說第一個星期落機，去中式超市入貨，男友話好想食雲吞，揀o左一款放入購物車，我望兩望，再同佢講，揀另一款「高寶點心」似乎好啲，我o地買o左高寶o既燒賣同雲吞，會見到燒賣o既豬肉粒，粒粒分明，肥膏唔多，到我o地試o左之後，真係覺得，肉質夠彈牙，唔會太味精，唔會太鹹，好食！！
雖然好食，但燒賣同雲吞o既味道相近，而且雲吞煮時會有湯，可以濕濕地口，所以自此，只買雲吞番屋企！！
我呢隻湯底味道，係屋企潮州湯底o既味道o黎，原本潮州湯底係豬骨湯，大地魚湯底，魚骨湯做底，但簡單蒜味湯底，都好香架！！
呢隻「高寶點心」，佢o既出品真係好有質素！！
材料（2 人份）：
雲吞 16 粒
豆卜 16 粒
湯底：
蒜頭 4 瓣
乾蒜 2 湯匙
雞粉 3 茶匙
胡椒粉 適量
做法：
1。蒜頭切細粒，唔落油，乾身放入鍋，爆香出味
2。見蒜頭變色，落乾蒜，爆至蒜頭同乾蒜變金黃色
3。落 1.5 碗熱水，搇蓋，煲 5 分鐘
4。篩起所有蒜粒，只剩低帶啡色o既蒜水
5。落雞粉，胡椒粉，調味，試試味，唔夠味可以落多少少雞粉
6。放入雲吞 (無需解凍) 同 豆卜，滾至浮起 (約 3－4 分鐘)，之後熄火焗 5 分鐘，完成。超爽滑！！
P.S. 全程大火，焗雲吞時熄火
點擊便能為這篇文章進行評等！
[評等總次數: 0，平均評等: 0]
在〈encore 十萬次o既男友最愛雲吞湯〉中有 2 則留言
對對對..佢真係好似燒賣, 但係又幾好味的~!!! 有一隻叫做大排水餃的都好好味架~!!!
都係「高寶」出架？定另一隻牌子？